Քաղաքակրթական ներուժը կեցության բարձրագույն արժեք է:

Հաղթել «Տուր դե Ֆրանսում»՝ առանց արգելված խթանիչների

07.24.2014

Այսօր, հուլիսի 24-ին Մոսկվայում բացվում է «Bicycle Film Festival» յուրահատուկ կինոփառատոնը, որն արդեն եղել է աշխարհի ավելի քան 50 քաղաքներում, այդ թվում Նյու-Յորքում, Փարիզում, Լոնդոնում, Սիդնեյում, Հոնկոնգում, Տոկիոյում և այլն: Այդ մասին «teatral-online.ru»-ի տեղեկատվությունը փոխանցում է «taglur.am»-ը:

Փառատոնի ծրագրում նախատեսված է հեծանվային շքերթ, մրցույթ՝ հեծանվահրապարակում, պիկնիկ՝ հեծանիվներով և, ամենագլխավորը, աշխարհի հեծանիվների ու նրանց տերերի մասին լավագույն ֆիլմերի ցուցադրություն:

Երեկոյան մեկնարկող փառատոնի ծրագրի շրջանակներում կինոդիտումները տեղի են ունենալու Մոսկվայի «Ֆլակոն» դիզայն-գործարանի բակում՝ բացօթյա:

«Հեծանվային պատմություններ» շարքից հեծանիվին սիրահարված մարդկանց մասին կցուցադրվեն 10 կարճամետրաժ կինոնկարներ: Իսկ հաջորդ օրն այդ թեմայով հանդիսատեսներին կներկայացվեն ամերիկացի, գերմանացի և էստոնացի կինեմատոգրաֆիստների նկարահանած 3 լիամետրաժ ֆիլմեր:

Երկու այլ՝ «Հեծանիվը քաղաքում» և «Հեծանվային ճանապարհորդություն» ծրագրերով, 10 երկիր ներկայացնող կինոների հերոսների հետ էլ, կարելի է հեծանիվներով անցնել Եվրոպայի ողջ տարածքով, լինել աֆրիկյան անապատներում, ծայրից ծայր կտրել ցուրտ Իսլանդիան, դիտել կինոնկար վտանգավոր ջունգլիներով անցնող ճանապարհի մասին:

Հեծանիվի ֆանատների համար նիդերլանդացի կինեմատոգրաֆիստները պատրաստել են «Մաքուր օդ» կինոնկարը, որը ներսից ներկայացնում է հեծանվասպորտի թիմին և ցուցադրում, որ հնարավոր է առանց արգելված խթանիչների հասնել հաղթանակի ամենահեղինակավոր մրցասպարեզում՝ «Տուր դե Ֆրանսում»:
    Դիտվել է 498 անգամ