Քաղաքակրթական ներուժը կեցության բարձրագույն արժեք է:

Դրվենգրադ էթնոգյուղում մեկնարկել է «Կուստենդորֆ» 8-րդ միջազգային կինոփառատոնը

01.22.2015


Սերբական Դրվենգրադ էթնոգյուղում, բաց երկնքի տակ կայացած թատերականացված ներկայացմամբ մեկնարկել է հայտնի ռեժիսոր Էմիր Կուստուրիցայի հիմնադրած «Կուստենդորֆ» 8-րդ միջազգային կինոփառատոնը: Այդ մասին հաղորդում է «taglur.am»-ը՝ հղում անելով «ԻՏԱՐ-ՏԱՍՍ»-ին:

Միջոցառման բացումը այս տարի նվիրվել է նացիզմի և ֆաշիսզմի դեմ տարած հաղթանակի 70 ամյակին:

Բացման արարողության ժամանակ Սերբիայի մշակույթի և տեղեկատվության նախարար Իվան Տասովեցն ասել է, որ այս փառատոնը « յուրահատուկ մի վայր է, որտեղ երիտասարդ մարդիկ կինոյի ոլորտում իրենց կարիերայի սկզբին կարող են հանդիպել կինոարվեստի մեծությունների հետ»:

Փառատոնի մրցութային ծրագրում ընդգրկված են տարբեր երկրների արտադրության 17 կարճամետրաժ ֆիլմեր, որոնցից առավել հաջողվածները կարժանանան այս ստուգատեսի մրցանակներին՝ ոսկե, արծաթե և բրոնզե հավկիթների:

Կուստուրիցայի հիմնած փառատոնի յուրահատկությունն այն է, որ այստեղ մրցույթային ծրագրից բացի, ցուցադրվում են նաև անցած մեկ տարվա ընթացքում վարձութային հաջողության հասած ֆիլմեր, կազմակերպվում՝ լուսանկարչական ցուցահանդեսներ և կազմակերպվում երաժշտական միջոցառումներ: Ամեն երեկո, կինոցուցադրություններից հետո, հյուրերի և մասնակիցների համար անցկացվում են վարպետաց դասեր, որոնք վարում են պրոֆեսիոնալ երաժիշտները : Օրինակ, փառատոնի առաջին օրը իր արվեստը, նվագախմբի ուղեկցությամբ, ներկայացրեց մոլդովացի երիտասարդ շեփորահար Ադամ Ստինգան:

Դրվենգրադ էթնոգյուղի «Կուստենդորֆ» 8-րդ միջազգային կինոփառատոնը կշարունակվի մինչև հունվարի 26-ը և կեզրափակվի մրութային ծրագրի հաղթողների անունների հրապարակմամբ:
    Դիտվել է 570 անգամ