Քաղաքակրթական ներուժը կեցության բարձրագույն արժեք է:

Բեռլինալեում ցուցադրվել է Էյզենշտեյնի համասեռականության մասին ֆիլմ

02.12.2015

Բրիտանացի հայտնի ռեժիսոր Փիթեր Գրինուեյի «Էյզենշտեյնը Գուանախուատոյում» ֆիլմը, որը պատմում է լեգենդար խորհրդային կինեմատոգրաֆիստի Մեքսիկա կատարած ուղևորության մասին նախօրեին՝ փետրվարի 11-ին, ցուցադրվել է Բեռլինի միջազգային կինոփառատոնում: Այդ մասին տեղեկացնում է «taglur.am»-ը՝ հղում անելով «ԻՏԱՐ-ՏԱՍՍ»-ին:

Թեև լրագրողները կինոնկարը պարգևատրել են բուռն ծափահարություններով, սակայն մամլո ասուլիսի ժամանակ զրույցը հիմնականում ծավալել են խորհրդային կինոռեժիսորի ոչ ավանդական սեռական կողմնորոշման թեմայի շուրջ:

«Էյզենշտեյնը Գուանախուատոյում» ֆիլմում անդրադարձ է կատարվում ռեժիսորի մեքսիկական ուղևորության վրա, որտեղ նա ամերիկացի պրոդյուսերների օժանդակությամբ պիտի նկարահաներ «Կեցցե Մեքսիկան» ֆիլմը: Սակայն այդ նախագիծն այդպես էլ չի իրականացել: Հենց այս պատմությանն էլ անդրադարձել է Գրինուեյն իր կինոնկարում:

Ըստ Գրինուեյի Մեքսիկայում Սերգեյ Էյզենշտեյնը հրապուրվել է իր ուղեկցորդ Պալոմինոյով, ում հետ էլ անցկացրել է ժամանակի մեծ մասը:

Ռուսաստանը ինչ-ինչ դժգոհություններ է բարձրաձայնել կինոնկարի վերաբերյալ, որոնց մասին Գրինուեյը տեղեկացել է մամուլից:

«Ռուսաստանի մասնակցությունն այս նախագծին եղել է զրոյական, այդ իսկ պատճառով ես չեմ հասկանում թե ինչպիսի՞ դժգոհություններ կարող են լինել: Եվ հետո, ինչու՞ այս ողջ ժամանակաշրջանում Ռուսաստանը այդպես էլ չի նկարահանել Սերգեյ Էյզենշտեյնի մասին իր կինոնկարը»,- հարցրել է Գրինուեյը:

Նրա կարծիքով Սերգեյ Էյզենշտեյնը եղել է ծայրահեղ անսովոր անհատականություն, որի մասին պետք է պատմվեր կինոնկարով: Իր կինոնկարն սկսելուց առաջ Գրինուեյն արդեն գիտեր, որ պետք է պատմի «ոչ թե կինոնկարի մասին, որն այդպես էլ չիրագործվեց», այլ Մեքսիկայում ռեժիսորի ապրած կյանքի մասին: Բացի այդ նա առաջարկում է իր ֆիլմն անվանել «10 օր, որ ցնցեց Էյզենշտեյնին»: Նա սրանով զուգահեռ է տանում խորհրդային «Հոկտեմբեր» ֆիլմի անվանափոխման պատմության հետ, որն ամերիկյան վարձույթ դուրս բերվեց «10 օր, որ ցնցեց աշխարհը» վերնագրով:

Բեռլինի 65-րդ կինոփառատոնը ընթանում է փետրվարի 5-15-ին: Կինոստուգատեսի գլխավոր մրցանակին հավակնում են 19 ֆիլմ, որոնց մեջ է նաև Փիթեր Գրինուեյի կինոնկարը:

Տեսանյութեր

Դիտվել է 727 անգամ