Քաղաքակրթական ներուժը կեցության բարձրագույն արժեք է:

Մալաթիայի իշխանությունները խոստացել են 2015 թ.-ի հունիսին սկսել հայկական տաճարի վերականգնումը

02.17.2015

2015 թ.-ի հունիսին Թուրքիայի Մալաթիայի կուսակալության ֆինանսավորմամբ վերանորոգման աշխատանքներ կսկսվեն տեղի հայկական Սուրբ Երրորդություն եկեղեցում: Այդ մասին տեղեկացնում է «taglur.am»-ը՝ հղում անելով սփյուռքահայ և տեղական մի շարք լրատվամիջոցների:

18-րդ դարում կառուցված և մինչև 1915 թ.-ն գործած եկեղեցին, որը հետագայում թուրքերը վերածեցին ռազմամթերքի պահեստի, հայտնի է նաև «Թաշխորան» անունով: Այս տաճարի վերանորոգման մասին խոսք ՝է եղել նաև 2002 թ.-ին: Նման նախաձեռնությամբ հանդես էր գալիս թուրք ազգայնականի կրակոցին զոհ գնացած Հրանտ Դինքը, ով ծնունդով Մալաթիացի էր: 2009թ.-ին թուրքական իշխանություններն, ի վերջո, հայկական պատմամշակութային հուշարձանը վերանորոգելու որոշում ընդունեցին, սակայն անհրաժեշտ միջոցներ նրանք կարողացան գտնել միայն այս տարի:

Ասենք, որ «asbarez.com»-ի հաղորդմամբ Մալաթիայում արդեն ավարտին են մոտենում նաև հոգևոր նշանակության հայկական մեկ այլ ճարտարապետական կառույցի՝ «Վենք» կոչված մատուռի վերանորոգման աշխատանքերը:

Պատմական Փոքր Հայքում գտնվող Մալաթիա քաղաքը մինչև Հայոց Մեծ եղեռնը բնակեցված էր հիմնականում հայերով: 1915 թ.-ին նրանց թիվը քաղաքում անցնում էր 15 հազարից: 1918թ.-ին Առաջին համաշխարհային պատերազմի ավարտին, Թուրքիայի կապիտուլացիայից հետո, եղեռնից մազապուրծ մալաթիացինեից 2 հազար մարդ կրկին վերադարձան հայրենի քաղաք, սակայն մեկ տարի անց իշխանության եկած քեմալականնները շարունակեցին հայատյաց քաղաքականությունը: 1921 թ.-ին հայկական թաղամասերը հրդեհվեցին, իսկ 1923 թ.-ին հայերի վերադարձը Մալաթիա պաշտոնապես արգելվեց:
    Դիտվել է 757 անգամ