Քաղաքակրթական ներուժը կեցության բարձրագույն արժեք է:

Հայտնաբերվել են աշխարհի ամենաթախծոտ ասպետին հորինողի աճյունի մնացորդները

03.17.2015


Իսպանիայում հայտնաբերվել է նշանավոր Դոն Կիխոտի հեղինակի՝ Միգել դե Սերվանտես Սավադրայի աճյունի մնացորդները: Այդ մասին Մադրիդում հայտարարել է ուսումնասիրողների խմբի ղեկավար Ֆրանսիսկո Էտչեբարիան:

«Կարելի է վստահ ասել, որ Մադրիդի սուրբ Երրորդություն եկեղեցու ստորգետնյա մատուռում բացահայտված գերեզմանում հայտնաբերվել են «Դոն Կիխոտի» հեղինակի ոսկորները»,- նշել է գիտնականը:

Ավելի վաղ, երկրաբանական ռադարով մենաստանային եկեղեցու հատակի քարասալերի տակ և պատերի դամբարաններում հայտնաբերվել են դատարկություններ, որոնք, ինչպես համարում էին գիտնականները, հնագույն հուղարկավորման տեղեր էին:

Հենց այդ ժամանակ էլ գիտնականները նշել են, որ իրենց աշխատանքների հաջորդ փուլը պետք է լինի դատարկությունները բացելը և դրանց մեջ հայտնաբերված մարդկային մնացորդների ուսումնասիրությունը: Սակայն այդ գործընթացը ձգձգվում էր, քանի որ Մադրիդի եպիսկոպոսը, հակառակ մայրաքաղաքի ղեկավարի խնդրանքներին, չէր շտապում համաձայնություն տալ այդտեղ հետազոտական աշխատանքներ կատարելու համար:

Թույլտվություն տալու ձգձգման պատճառներից մեկն այն է եղել, որ այդ նույն տարածքում 20-րդ դարում իրենց հարազատներին հուղարկավորած քաղաքացիները սպառնում էին եպիսկոպոսին դատի տալ՝ դամբարանները ինքնակամ բացելու համար: Մեկ այլ պատճառ էլ եղել է այն, որ Մադրիդի ինքնավար կառավարությունը պահանջել է տալ գրավոր երաշխիք, որ ենթադրվող աշխատանքների իրականացման դեպքում վնաս չի հասցվի պատմամշակութային արժեք ունեցող եկեղեցուն: Այդ մասին տեղեկացնում է «euromag.ru»-ն:
    Դիտվել է 654 անգամ