Քաղաքակրթական ներուժը կեցության բարձրագույն արժեք է:

Դերասանը և նրա կինը բուժկենտրոնի շինարարությանը նվիրել են 15 մլն դոլար

12.11.2015


Հոլլիվուդյան հանրահայտ դերասան Քրք Դուգլասը և նրա կինը Ալցհեյմերի հիվանդությամբ տառապող մարդկանց խնամքի կենտրոնին են նվիրաբերել 15 մլն դոլար: Այդ մասին տեղական լրատվամիջոցների տարածած տեղեկատվությունը փոխանցում է «taglur.am»-ը՝ հղում անելով «ՏԱՍՍ»-ին:

Ըստ լրատվամիջոցների, հաստատությունը, որի շինարարությունը Լոս-Անջելոսում կսկսվի 2016թ.-ին, կկրի այս շաբաթ իր 99 ամյակը նշող դերասանի անունը: Կենտրոնի ընդհանուր արժեքը կազմում է 35 մլն դոլար և նախատեսված է 80 մարդու համար: Այն իր ծառայություններն է առաջարկելու նման սպասարկման կարիք ունեցող դերասաններին և հոլլիվուդյան կինոարդյունաբերության ներկայացուցիչներին:

Հեռուստատեսության և կինոյի ոչ առևտրային հիմնադրամը, որը իրականացնում է դրամահավաքը և այս նախագիծը, երախտագիտություն է հայտնել Դուգլաս ամուսիններին, ովքեր դարձել են իրենց կազմակերպության պատմության մեջ ամենախոշոր ներդրում կատարողները :

«Մենք անչափ շնորհակալ ենք Քրք և Էնն Դուգլասներին իրենց այսքան առատաձեռն զոհաբերության համար: Այդ միջոցները մեզ կօգնեն իրականացնել այս մտահղացումը և օգնել ինչպես հիվանդության դեմ պայքարող մարդկանց, այնպես էլ նրանց ընտանիքների անդամներին, ովքեր ի վիճակի չեն անհրաժեշտ ձևով հոգ տանել իրենց հիվանդ մերձավորների նկատմամբ»,- նշվում է հիմնադրամի հայտարարության մեջ:

Քրք Դուգլասը ծնվել է 1916 թ.-ին, Նյու-Յորքի նահանգում, աղքատ ընտանիքում: Նա համարվում է հոլլիվուդյան «Ոսկե ժամանակաշրջանի» կենդանի լեգենդներից մեկը: Նա կինոսիրող հանրությանը հայտնի է «Սպարտակ» (1960թ.), «Կյանքի ծարավ» (1956թ.) և այլ ֆիլմերից:

Ի դեպ, «Կյանքի ծարավ» ֆիլմում նկարիչ Վան Գոգի կերպարը մարմնավորելու համար դերասանը արժանացել է «Ոսկե գլոբուս» մրցանակի, իսկ 1996թ.-ին կինոարվեստի զարգացման մեջ ունեցած մեծ ներդրումների համար պարգևատրվել է պատվավոր «Օսկար»-ով:

    Դիտվել է 581 անգամ