Քաղաքակրթական ներուժը կեցության բարձրագույն արժեք է:

Թալանվել է Ժան Մարեի գերեզմանը

01.11.2016


Ֆրանսիական կինոյի մեծ վարպետ Ժան Մարեի գերեզմանը թալանվել է անհայտ չարագործների կողմից: Այդ մասին տեղի «Le Croix» պարբերականի տեղեկատվությունը փոխանցում է «taglur.am»-ը՝ հղում անելով «lenta.ru»-ին:
Վալլորիսում գտնվող շիրիմի գերեզմանաքարի վրայից պոկել և տարել են 1946 թ.-ին նկարահանված «Գեղեցկուհին և հրեշը» ֆիլմի հրեշի գլուխը պատկերող բրոնզե քանդակը:

60 սմ բարձրությամբ և 35 կգ քաշ ունեցող արվեստի գործը գնահատվում է 4 հազար եվրո:

Այդ քանդակը ձուլվել է Ժան Մարեի այսօր չպահպանված աշխատանքի բնօրինակից (նա հաջողությամբ իր ուժերն էր փորձում նաև քանդակագործության ասպարեզում): Դերասանի շիրիմի վրա տեղադրված է եղել երկու այդպիսի աշխատանք, ինչպես նաև առյուծի գլուխ պատկերող բրոնզձույլ մի դիմակ և եղջրավոր և թևավոր մի սֆինքս:

«Դրանք միայ պարզապես քանդակներ չեն: Դրանք խորհրդանշում են հատուկ ժառանգություն, ֆրանսիական կինոյի գլուխգործոցներ: Ես կարծում եմ քանդակների հափշտակությունը վիրավորում է Ժան Մարեի և Ժան Կոկտոյի («Գեղեցկուհին և հրեշը» ֆիլմի ռեժիսորի) հիշատակը»,- հայտարարել է Վալլորիսի քաղաքագլուխ Միշել Սալոկին:

Նա խոստացել է ուժեղացնել գերեզմանի հսկողությունը:

Ժան Մարեն կինոյում խաղացել է ավելի քան 100 դեր: Նա գլխավոր դերակատարումներով հանդես է եկել մինչև այսօր էլ հետաքրքրությամբ դիտվող «Ֆանտոմաս» եռապատման մեջ, «Կոմս Մոնտե Քրիստո», «Օրփեոս», «Երկաթե դիմակ», «Թշվառները» և այլ ֆիլմերում:

Ժան Մարեն մահացել է 1998 թ.-ին, 85 տարեկան հասակում:
    Դիտվել է 552 անգամ