Քաղաքակրթական ներուժը կեցության բարձրագույն արժեք է:

«Ոսկե արմավենու ճյուղի» համար կպայքարի 20 ֆիլմ

05.11.2016


Այսօր, մայիսի 11-ին, երեկոյան ֆրանսիայում կմեկնարկի Կաննի 69-րդ միջազգային կինոփառատոնը: Այն այս տարի այն կրում է «10-րդ մուսայի պարահանդես» խորագիրը և ընդհանուր առմամբ կտևի երկու շաբաթ: Այդ մասին տեղեկացնում է «taglur.am»-ը՝ հղում անելով «ՏԱՍՍ»-ին:

Այս տարի համաշխարհային կինոարվեստի նշանավոր միջոցառումը կընթանա ոստիկանական խստացված վերահսկողության և անվտանգության արտակարգ նախապատրաստությունների ներքո: Ֆրանսիայի ՆԳՆ նախարար Բերնան Կազնևայի ասելով վտանգի մակարդակը, որին բախվում է կինոֆորումը «հիմա զգալիորեն ավելի բարձր է, քան երբևէ»:

Այս բարձր զգուշավորությունը կապված է նաև Ֆրանսիայում այսօր գործող արտակարգ դրության հետ, որը երկրում հայտարարվել է 2015 թ.-ի նոյեմբերի 13-ին Փարիզում տեղի ունեցած ահաբեկչությունից հետո: Հիշեցնենք, որ այդ ժամանակ «Իսլամական պետություն» խմբավորման ահաբեկիչների գործողությունների հետևանքով զոհվեց 130 և վիրավորվեց 350 անմեղ քաղաքացի:

Չնայած ձեռնարկված խիստ միջոցառումներին, Ֆրանսիայի ուժային կառույցների պատասխանատուները վստահեցրել են, որ դրանք ոչ մի կերպ չեն անդրադառնա կամ խոչընդոտի կինոփառատոնի բնականոն աշխատանքի վրա:

Փառատոնին մասնակցելու հայտ են ներկայացրել մոտ 2 հազար կինոժապավեն: Դրանցից միայն 100-ն է ընտրվել կինոմրցույթի այս կամ այն ծրագրում ընդգրկելու համար: Իսկ գլխավոր մրցանակի՝ «Ոսկե արմավենու ճյուղի» համար կպայքարի 20 ֆիլմ:

Կաննի 69-րդ միջազգային կինոփառատոնի հիմնական մրցույթին մասնակցելու համար հավաքվել են վերջին ժամանակների համար աննախադեպ թվով հայտնի կինոգործիչներ: Նրանց թվում են ռեժիսորներ Ջիմ Ջարմուշը, Պեդրո Ալմոդովարը, Փակ Չհան-Ուքը, Փոլ Վերխուվեն, Դարդենն եղբայները, Քեն Լոուչը և այլք:
    Դիտվել է 613 անգամ