Քաղաքակրթական ներուժը կեցության բարձրագույն արժեք է:

Բելոռուսիայում հարկում են նույնիսկ Նոբելյան մրցանակը

02.14.2017

Բելոռուս գրող Սվետլանա Ալեքսեևիչը ստիպված է եղել բելոռուսիայի պետական բյուջեին վճարել 197 հազար եվրո եկամտահարկ՝ իր ստացած Նոբելյան մրցանակից: Այդ մասին տեղեկացնում է «taglur.am»-ը՝ հղում անելով «belsat.eu»-ին:

Դեռ անցյալ տարի Բելոռուսի Հարկերի նախարարությունը տեղեկատվություն էր տարածել այն մասին, որ իրենց երկրի միակ Նոբելյան մրցանակակրին հարկ վճարելուց կարող է հատուկ հրամանագրով ազատել միայն նախագահ Լուկաշենկոն:

Ալեքսեևիչը որպես մրցանակ ստացել է 8 մլն շվեդական կրոն ( մոտ 970 հազար դոլար):

Գրողը իր մրցանակը պետության կողմից հարկելու կապակցությամբ հայտարարել է, որ աշխարհում որևէ մեկը Նոբելյան մրցանակը չի հարկում, բայց ինքը չի դիմի Լուկաշենկոյին, քանի որ. «Արժանապատվությունը ավելի թանկ» է:

Ասենք, որ իր մրցանակից Ալեքսեևիչն արդեն 100 հազար դոլար նվիրաբերել էր որպես բարեգործություն:

Սվետլանա Ալեքսեևիչը Նոբելյան մրցանակակիր է դարձել 2015թ.-ին՝ գրականության գծով: Լուկաշենկոն այդ կապակցությամբ նրան շնորհավորել էր իր մամլո ծառայության միջոցով, իսկ երկրի կրթության նախարարությունը որոշել էր գրողի ստեղծագործությունները կրկին վերադարձնել դպրոցական ծրագրեր:

Անցյալ տարի հոկտեմբերին Ալեքսեևիչը, որը քննադատական վերաբերմունք ունի երկրում սոցիալական և մի շարք այլ ոլորտների ուղղությամբ իրականացվող քաղաքականության նկատմամբ, հայտարարել է, որ իշխանությունը «ցույց է տալիս», որ ինքը՝ Ալեքսեևիչը գոյություն չունի: Նա նաև հայտարարել է, որ իր հայրենիքում ոչ մի տեղ իր գործերը չեն հրատարակում և ինքը չի կարող որևէ տեղ ելույթ ունենալ:
    Դիտվել է 319 անգամ