Քաղաքակրթական ներուժը կեցության բարձրագույն արժեք է:

Իվան Ահեղն ու իր որդին կրկին ենթարկվել են վանդալի հարձակման

05.26.2018


Նախօրեին, մայիսի 25-ին, Մոսկվայի Տրետյակովյան պատկերասրահում ինչ-որ մի տղամարդ ցուցադրանքը այցելուներից բաժանող ժապավենի երկաթյա կարճ հենասյունով վնասել է Իվան Ռեպինի «Իվան Ահեղը սպանում է իր որդուն» կտավը: Այդ մասին տեղեկատվությունը տարածել է թանգարանի մամլո ծառայությունը:

Հաղորդվում է, որ նկարը լուրջ վնասվածքներ է ստացել: «Կտավի կենտրոնական մասը երեք հատվածներում պատռվել է:

Պատռվածքներից մեկը նկատելի է հատկապես արքայազնի մարմնի վրա: Բացի այդ տեղեկացվում է, որ «ապակու ընկնելու հետևանքով շատ է տուժել նաև հեղինակի ձեռքով պատրաստված շրջանակը»: Միայն երջանիկ պատահականությամբ չեն վնասվել թագավորի և արքայազնի դեմքի և ձեռքերի հատվածները:

Թանգարանի աշխատակիցները օպերատիվ կարգով հետազոտել են արվեստի վնասված գլուխգործոցը և արագ կարգով իրականացրել են համապատասխան հակավթարային գործողություններ՝ շրջանակն առանձնացրել են նկարից, կտավից հեռացրել են ապակու բեկորները: Դրանից հետո կտավը հանվել է իր մշտական ցուցադրության վայրից և տեղափոխվել թանգարանի վերականգնման արհեստանոց:

Հարուցվել է քրեական գործ:

«Իվան Ահեղը սպանում է իր որդուն» նկարը Իվան Ռեպինը նկարել է 1883-1885թվականներին: Այն հեղինակից գնել է Տրետյակովյան պատկերասրահի հիմնադիր Պավել Տրետյակովը՝ 1885թ.-ին:

Այս ստեղծագործությունը իր պատմության ընթացքում երկրորդ անգամ է ենթարկվում վանդալի հարձակման: Այդպիսի մեկ դեպք էլ տեղի է ունեցել 1913թ.-ի հունվարի 16-ին, երբ խոշոր ֆաբրիկատեր Աբրամ Բալաշովի 25-ամյա հնադավան որդին դանակով երեք անգամ հարվածել էր կտավին: Դրանից հետո նկարների կերպարները վերականգնողները ստիպված եղան նորից վերստեղծել: Այդ աշխատանքներին մասնակցել է նաև հեղինակը՝ Իվան Ռեպինը:

Նշենք, որ 1927թ.-ից նկարը պահպանվում էր ապակու տակ: Ռեպինի այս գործը թանգարանի մշտական ցուցանմուշներից է և երբեք դուրս չի հանվում այլ տեղերում ցուցադրելու համար:
    Դիտվել է 293 անգամ