Քաղաքակրթական ներուժը կեցության բարձրագույն արժեք է:

«Սպիտակ արջում» կալանավորված ռեժիսորի կյանքը...

06.08.2018

Օրերս գրականության ոլորտի Նոբելյան, Պուլիտցերյան և Բուքերյան մի խումբ մրցանակակիրներ միացել են Մարդու իրավունքների պաշտպանության ամերիկյան կենտրոնի՝ Ռուսաստանի նախագահ Վլադիմիր Պուտինին ուղղված բաց նամակին, որով պահանջվում է ազատ արձակել «անօրինականորեն» դատապարտված ուկրաինացի ռեժիսոր Օլեգ Սենցովին, որն արդեն երկար ժամանակ գտնվում է անժամկետ հացադուլի մեջ:

Նամակի տակ ստորագրել է 48 մարդ, այդ թվում գրողներ Հերթա Մյուլլերը, Ջոն Քութզեեն, Սալման Ռուշդին, Ջոնաթան Ֆրանզենը, Մարգարեթ Էթվուդը և ուրիշներ:

Նամակում նշվում է, որ աշխարհի 2018թ.-ի ֆուտբոլի առաջնության առթիվ Ռուսաստանի նկատմամբ հետաքրքրությունը հատուկ է լինելու: «Միավորող համընդհանուր այդ միջոցառման ոգով մենք, այնուամենայնիվ, կոչ ենք անում ձեզ օգտվել ստեղծված հնարավորությունից, որպեսզի արվի հզոր հայտարարություն՝ անհապաղ և առանց նախապայմանների ազատելով Սենցովին: Դրանից կախված է նրա կյանքը»,- գրում են նամակի հեղինակները:

Օլեգ Սենցովը գտնվում է Ռուսաստանի Յամալո-Նենեցական ինքնավար մարզի «Սպիտակ արջ» անունով բանտում: Նա մեղադրվել է Ղրիմի թերակղզում «ահաբեկչական կազմակերպություն ստեղծելու մեջ»: Իր անժամկետ հացադուլը նա սկսել է մայիսի 14-ից:

Սենցովն իրեն մեղավոր չի ճանաչել և պարեբերաբար հայտարարել է իր նկատմամբ կիրառվող խոշտանգումների մասին: Նրա գործը լայն արձագանք է ստացել ամբողջ աշխարհում: Մինչ այս նրան իրենց օժանդակությունն են հայտնել տարբեր երկրների քաղաքական ու մշակութային բազմաթիվ գործիչներ:




Այս թեմայով այլ հղումներ-1
    Դիտվել է 556 անգամ