Քաղաքակրթական ներուժը կեցության բարձրագույն արժեք է:

Գիշերը «Մոնա Լիզայի» հետ՝ հարմարավետ բազմոցին...

04.09.2019


Հետաքրքիր խաղարկության առաջարկությամբ է հանդես եկել աշխարհում ամենից շատ այցելուները ընդունող Ֆրանսիայի հայտնի «Լուվր» թանգարանը: Առաջարկության էությունն այն է, որ եթե որևէ մեկը ցանկանում է գիշերն անցկացնել հայտնի մշակութային այդ հաստատությունում և առանց վկաների ներկայության հանդիպել «Մոնա Լիզային», պետք է ընդամենը Airbnb.com տիրույթում գործող կայքում մինչև ապրիլի 12-ը գրավոր նկարագրի, թե ինչու հենց ինքը ապրիլի 30-ի լույս մայիսի 1-ի գիշերը պետք է դառնա «Մոնա Լիզայի» ցանկալի հյուրը: Այդ մասին տեղեկացնում է «taglur.am»-ը՝ հղում անելով «theartnewspaper.ru»-ին:

Ասենք որ խաղարկության հաղթողներ կճանաչվեն մասնակիցներից միայն երկուսը:

«Մթնոլորտ ստեղծող ֆրանսիական երաժշտության ուղեկցությամբ հաղթողը «Մոնա Լիզայի» պատվին կըմբոշխնի վերածննդի խոհանոցով ոգեկոչված ապերատիվ՝ տեղավորված հանրահայտ կտավի դիմաց հատուկ իր համար բեված հարմարավետ բազմոցին»,- պատմել է իրենց նախագծի մասին Լուվրի ներկայացուցիչը:

Սակայն դրանով ընտիր երեկոն չի ավարտվում: Ապերատիվից հետո հաղթողը կճաշակի ընթրիք հատուկ այդ նպատակով կահավորված հյուրասենյակում, որի տիրուհու դերը կկատարի սիրո աստվածուհի Միլոսյան Վեներան: Դրանից հետո սպասվում է ակուստիկ համերգ, որը կկայանա Նապոլեոն 3-րդի շքեղ բնակարանում: Իսկ այդ անսովոր երեկոյի վերջում հաղթողը կգնա Լուվրի հայտնի բուրգում զետեղված ննջարան:

Խաղարկությունը կազմակերպվել է հենց այդ ապակե բուրգի կառուցման 30-ամյակի կապակցությամբ:

Ասենք, որ 2017թ.-ին Ամստերդամի թանգարանում Ռեմբրանդտի վրձնած կտավի առջև այդպիսի հեքիաթային մի գիշեր էլ անցկացրել է դպրոցական ուսուցիչ Ստեֆան Կասպերը: Մշակութային հաստատությունը այդպես է պարգևատրել իր 10 մլն-րդ այցելուին: Կասպերը հետո պատմել է, որ ինքը գիշերն անցկացրել է հոլանդացի հանճարեղ նկարչի «Գիշերային պարեկ» հայտնի կտավից ընդամենը երկու մետր հեռավորությամբ: Նա թանգարանում բացարձակ միայնակ է եղել: Իսկ հատակը, որտեղ գիշերել է Կասպերը, ծածկված է եղել հատուկ նրա համար փռված ուղեգորգով:





Լուսանկարն՝ ըստ հղման աղբյուրի:


    Մշակույթը նվիրյալի գործ է, իսկ մշակույթի նվաճումներին հանրությանը ծանոթացնելը քաղաքացիական պարտք: Թղթակցեք «Թագլուր» կայքին;

    Հեռ.: 099.31.74.60
    էլ. Փոստ: taglur@yahoo.com

    Դիտվել է 187 անգամ