Քաղաքակրթական ներուժը կեցության բարձրագույն արժեք է:

Աշխարհում չկա թատրոն, որի գեղարվեստական ղեկավարը կես դար լինի միևնույն մարդը

03.29.2014

Երևանի Կ. Ստանիսլավսկու անվան պետական ռուսական դրամատիկական թատրոնը նշում է իր 75-ամյակը:

Այդ առթիվ այսօր կայացած մամլո ասուլիսում, թատրոնի գեղարվեստական ղեկավար Ալեքսանդր Գրիգորյանը ներկայացրեց մշակութային օջախի անցած ուղին, վերհիշեց Հայաստանի թատերական կյանքի կարևոր բաղադրիչը դարձած և դերասանների մի քանի սերունդների հերթափոխ ընդունած թատրոնի նվաճումները:

Գրիգորյանը նշեց, որ իր ղեկավարած հաստատության նպատակը հիմնադրման օրվանից անփոփոխ է: Այն կոչված է հայ թատերական միտքը և մշակույթը ներկայացնել ռուս և ռուսախոս հանդիսատեսին, իսկ հայաստանցի հանդիսատեսին ցուցադրել ռուս և, ռուսաց լեզվի միջոցով՝ նաև համաշխարհային թատերգության լավագույն նմուշները:

Թատրոնի կայացման գործում տարբեր տասնամյակներում իրենց ներդրումներն են ունեցել հայ բեմի այնպիսի նշանավոր ներկայացուցիչներ, ինչպիսիք են Լ. Քալանթար, Ա. Բուրջալյանը, Ա. Գուլակյանը, Վ. Վարդանյանը:

Ի դեպ, Երևանի ռուսական թատրոնի գլխավոր ռեժիսորի պաշտոնում ամենաերկարակյացը Ալեքսանդր Գրիգորյանն է: Նա այս կոլեկտիվի ղեկավարն է շուրջ 50 տարի: Ինչպես նշվեց մամլո ասուլիսի ժամանակ, աշխարհում դեռ չի եղել մի այնպիսի թատրոն, որի գեղարվեստական ղեկավարը կես դար լինի միևնույն մարդը: Այդ կապակցությամբ նույնիսկ խոսք կա, որ նույն թատրոնում գլխավոր ռեժիսորի մասնագիտական բազմամյա գործունեության փաստը պետք է ներկայացվի Գինեսի ռեկորդների գրքին:

Այսօր թատրոնը որոշ դժվարություններ ունի հյուրախաղային գործունեություն իրականացնելու հարցերում: Թեև կապերը թե ռուսական և թե եվրոպական երկրների թատերական կենտրոնների ու փառատոների հետ պահպանվում են, բայց այդ ծախսատար գործընթացներին Ստանիսլավսկու անվան թատրոնն իր ներկայացումներով միշտ չէ, որ ի վիճակի է մասնակցել:

Ալեքսանդր Գրիգորյանը նշեց, որ, օրինակ, Լեհաստանի Կրակով քաղաքի իրենց գործընկերներից արդեն 17 տարի շարունակ հրավեր են ստանում, բայց այդպես էլ միջոցներ չեն գտնվում այնտեղ հյուրախաղերի մեկնելու ծախսերը հոգալու համար: Բայց այլ գործընկերների հետ ակտիվ մասնագիտական շփումներ, այնուամենայնիվ ստացվում են: Օրինակ, ապրիլի 8-ին իրենք հյուրախաղերով հանդես կգան Ռուսաստանի հյուսիսային մայրաքաղաքում՝ Պետերբուրգում:

Կան նաև շփումներ անհատական մակարդակով: Ա. Գրիգորյանը երախտագիտությամբ խոսեց Մոսկվայի գեղարվեստական ակադեմիական թատրոնի (МХАТ-ի) ղեկավար Օլեգ Տաբակովի մասին, ով շատ ջերմ վերաբերմունք ունի երևանցի իր գործընկերների նկատմամբ և բավականին լուրջ ֆինանսական աջակցություն է ցուցաբերել նաև Ստանիսլավսկու անվան երևանյան թատրոնին:

Մամլո ասուլիսում ՀՀ մշակույթի նախարարության ներկայացուցիչ Վարդան Գրիգորյանը իր խոսքում անդրադարձավ այն կարևոր առաքելությանը, որ այսօր պատվով իր վրա է կրում ռուսական դրամատիկականը: «Իր գեղարվեստական ճաշակով և ներկայացումների յուրահատկությամբ ռուսական թատրոնը մեր մշակութային առօրյայում յուրահատուկ է և առանձնանում է դրական իմաստով: Այն Երևանում ներկայացնում է ռուսալեզու մշակույթը և ոչ թե միայն ռուսականը»: Ըստ նրա թատրոնի աշխատանքը իր նկատմամբ ձևավորել է հանդիսատեսի դրական վերաբերմունք, իսկ թատրոնն էլ, իր հերթին ամեն կերպ աշխատում է էլ ավելին մատուցել իր հանդիսատեսին:

75-ամյա հոբելյանը առիթ է ծառայել, որ Երևանի Կ. Ստանիսլավսկու թատրոնում մի անկյուն առանձնացվի և այնտեղ հիմնադրվի ցուցահանդես-թանգարան, որտեղ տեղ են գտել արխիվային լուսանկարներ, տարբեր ներկայացումների հերոսների ու հերոսուհիների զգեստներ, հուշանվերներ, որոնք թատրոնը կամ թատերախմբի անդամները ստացել են տարբեր առիթներով: Ըստ Վ. Գրիգորյանի, դա յուրահատուկ միջավայր է ձևավորում և նախապայման է հանդիսանում, որ հանդիսատեսը դահլիճ մտնելուց առաջ տրամադրվի թե որտեղ է ինքը գտնվում և ինչ միջավայրում է ինքը հանդիպելու այս կամ այն թատերախաղին:

Ավելացնենք, որ այսօր երեկոյան Ստանիսլավսկու անվան թատրոնի բեմը կունենա տոնական ձևավորում: Այստեղ, թանգարան-ցուցահանդեսի բացումից հետո կկայանա հոբելյանական երեկո, որին կմասնակցեն նաև բեմարվեստի բազմաթիվ անվանի ներկայացուցիչներ ու երկրպագուներ:
    Դիտվել է 1086 անգամ
    123456789101112131415161718192021222324252627282930313233343536373839404142434445464748495051525354555657585960616263646566676869707172737475767778798081828384858687888990919293949596979899100101102103104105106107108109110111112113114115116117118119120121122123124125126127128129130131132133134135136137138139140141142143144145146147148149150151152153154155156157158159160161162163164165166167168169170171172173174175176177178179180181182183184185186187188189190191192193194195196197198199200201202203204205206207208209210211212213214215216217218219220221222223224225226227228229230231232233234235236237238239240241242243244245246247248249250251252253254255256257258259260261262263264265266267268269270271272273274275276277278279280281282283284285286287288289290291292293294295296297298299300301302303304305306307308309310311312313314315316317318319320321322323324325326327328329330331332333334335336337338339340341342343344345346347348349350351352353354355356357358359360361362363364365366367368369370371372373374375376377378379380381382383384385386387388389390391392393394395396397398399400401402403404405406407408409410411412413414415416417418419420421422423424425426427428429430431432433434435436437438439440441442443444445446447448449450451452453454455456457458459460461462463464465466467468469470471472473474475476477478479480481482483484>>հաջորդ
    Արխիվ ըստ ամիսների