Քաղաքակրթական ներուժը կեցության բարձրագույն արժեք է:

Շեքսպիրյան 12-րդ փառատոնի շրջանակներում Երևանում է ռեժիսոր Ռոբերտ Ստուրուան

10.20.2016


Նախօրեին՝ հոկտեմբերի 19-ին, Հայաստանի թատերական գործիչների միության դահլիճում կայացավ Թբիլիսիի Շոթա Ռուսթավելու անվան թատրոնի գեղարվեստական ղեկավար, նշանավոր ռեժիսոր Ռոբերտ Ստուրուայի վարպետության դասը:

Այս հետաքրքրական հանդիպումը հայաստանցի թատերական գործիչների, թատերասերների և ուսանողների համար հնարավոր էր դարձել հոկտեմբերի 20-ին Երևանում մեկնարկելիք Շեքսպիրյան 12-րդ փառատոնի շրջանակներում:

Ողջունելով ներկաներին, Ռոբերտ Ստուրուան ասաց. «Մենք մեծ ուրախությամբ համաձայնվեցինք մասնակցել փառատոնին, քանի որ զգում ենք, որ այստեղ մեզ սիրում են, և այդ սերը փոխադարձ է»:

Վրացի ռեժիսորը իր խոսքում ընդգծեց, որ «Շեքսպիրյան փառատոնն իր ձևաչափով, կարելի է ասել, յուրահատուկ է», և ինքն ուրախ է, որ կարճատև դադարից հետո այն կրկին շարունակվում է:

« Ձեր փառատոնը կայացած է: Այդ հարցում մեծ ավանդ ունի փառատոնի հիմնադիր Հակոբ Ղազանչյանը, իսկ այսօր այդ գործը շարունակում է փառատոնի տնօրեն Կարո Բալյանը»,- ասաց Ռոբերտ Ստուրուան:

Ռ. Ստուրուան տեղեկացրեց, որ Երևանի Շեքսպիրյան փառատոնին Թբիլիսիի Շոթա Ռուսթավելիի անվան ակադեմիական թատրոնը կներկայանա իր բեմադրած «Հուլիոս Կեսար» ներկայացումով:

«Պետք է խոստովանեմ, որ ներկայացումը փոքր-ինչ համարձակ է: Իսկ ես համարձակ ներկայացումների կողմնակից եմ: Գտնում եմ, որ թատրոնի մարդը պետք է լինի համարձակ: Նա չպետք է վախենա, այսպես ասած, թույլատրելիի սահմանը անցնելուց…»,- ասաց ռեժիսորը:

Ավելացնենք, որ Ռոբերտ Ստուրուայի վարպետության դասը կայացավ հարց ու պատասխանի ձևաչափով:
    Դիտվել է 888 անգամ