Քաղաքակրթական ներուժը կեցության բարձրագույն արժեք է:

Թատրոնի շենքը կվերակառուցվի ըստ Արթուր Մեսչյանի նախագծի

04.11.2014

Ստեփանակերտի թատրոնը մինչև 2016-2017թթ.-երը իր հանդիսատեսներին կներկայանա նորովի և վերակառուցված տեսքով: Այդ մասին է հաղորդում Հայաստանի թատերական գործիչների միության (ՀԹԳՄ-ի) պաշտոնական կայքը:

Ըստ հաղորդագրության մշակութային օջախի վերակառուցման աշխատանքները կիրականացվեն ըստ ճարտարապետ Արթուր Մեսչյանի նախագծի: Ինչպես նշել է ՀԹԳՄ-ի նախագահ Հակոբ Ղազանչյանը, շինարարական աշխատանքներից հետո «այն իր տեսակով եզակի թատրոն է լինելու»:

Նշենք, որ Ստեփանակերտի թատրոնը պահպանում է իր աշխատանքային բնականոն գրաֆիկը և շարունակում է արցախցի հանդիսատեսներին ներկայացնել հայ և օտարերկրյա հեղինակների դրամատիկական աշխատանքների սեփական մեկնաբանությունները:

Վերջերս թատրոնը բեմ հանեց Էդուարդո դե Ֆիլիպոյի «Ծննդյան տոները սինյոր Կուպելոյի տանը» պիեսի սեփական բեմադրությունը՝ Երևանի կինոյի և թատրոնի պետական ինստիտուտի դիպլոմանտ Ռուզաննա Խաչատրյանի ներկայացմամբ:

« Ստեփանակերտի թատրոնը ձեռք բերեց բավականին հետաքրքիր տեղացի կադր»,- իր գնահատականն է տվել ներկայացման պրեմիերային ներկա գտնվող ՀԹԳՄ-ի նախագահ Հ. Ղազանչյանը՝ ընդգծելով, որ Ռուզաննա Խաչատրյանը մտադիր է «…ինստիտուտն ավարտելուց հետո վերադառնալ ԼՂՀ-ի մայրաքաղաք և աշխատել տեղի թատրոնում»:

Ավելացնենք, որ Հայաստանի թատերական գործիչների միությունը մտադիր է Ստեփանակերտում բացել կազմակերպության տեղական բաժանմունքը:
    Դիտվել է 1194 անգամ