Քաղաքակրթական ներուժը կեցության բարձրագույն արժեք է:

Առաջին անգամ բացօթյա բալետ՝ մինչև հարսանիքը մահացած հարսնացուների հոգիների մասին

05.15.2014

Անսովոր պրեմիերա է սպասվում շաբաթ օրը Մոսկվայի Գորկու զբոսայգում: Ռուսաստանի մայրաքաղաքի Ստանիսլավսկու և Նեմիրովիչ-Դանչենկոյի անվան երաժշտական թատրոնը հայտնի զբոսայգում կներկայացնի «Ժիզելը»: Այդ մասին «РИА Новости» լրատվական գործակալությանը հայտնել է թատրոնի գլխավոր տնօրեն Արա Կարապետյանը:

«Այս նախագիծը մեր համար անսովոր է, թեև նախկինում մենք այգում «Ժիզել» արդեն պարել ենք: Սակայն դա եղել է Գրանադայում , Ալգամբրայի այգիներում: Մոսկվայում այսպիսի իրադարձություն տեղի կունենա առաջին անգամ»,- նշել է Կարապետյանը և ավելացրել, որ այպիսի նախաձեռնության իրականացումը բավականին աշխատատար գործընթաց է՝ կապված հատուկ բեմ կառուցելու հետ, որի տակ պետք է հարմարացվի ամբողջ գեղարվեստական ձևավորումը: Բացի այդ պետք է կառուցվեն արտիստների դիմահարդարաններ: Կա նաև մի անկանխատեսելի հանգամանք՝ եղանակը: Տնօրենը նշել է, որ այդ կապակցությամբ մայիսի 17-ին եղանակի տեսաբանները խոստացել են լավ եղանակ:

Կատարողների համար թատրոնից դուրս, բաց բեմում ելույթ ունենալը անսովոր է: Բայց Արա Կարապետյանը մտածում է, որ ամեն ինչ հաջող է ընթանալու:

«Այս նախագիծը մեր համար շատ կարևոր է: Մեր դահլիճը տեղավորում է ընդամենը հազար հանդիսատես: Դա նշանակում է, որ, օրինակ, «Ժիզելը» կարող են տարվա ընթացքում դիտել 10 հազար մարդ»,- հաշվարկներ է արել Երաժշտական թատրոնի գլխավոր տնօրենը:

Ըստ նրա Գորկու անվան զբոսայգում կլինեն 2 հազար նստատեղեր և ավելի քան 10 հազար տեղ ներկայացումը կանգնած դիտելու համար: «Եվ դա կարող են լինել ոչ միայն մեր մշտական հանդիսատեսները, այլև այնպիսիք, ովքեր երբևէ չեն դիտել բալետային ներկայացում»,- ասել է Կարապետյանը՝ ընդգծելով, որ նման զանգվածային ցուցադրությունները լսարանը ավելի ընդարձակելու հնարավորություն է, որի մասին մտածում է յուրաքանչյուր թատրոն:

Աշխարհի ամենառոմանտիկական բալետային ներկայացումներից մեկի՝ «Ժիզելի» սյուժեն հյուսվում է վիլլիսների՝ մինչև հարսանիքը մահացած հարսնացուների հոգիների մասին հնագույն լեգենդի հիման վրա: Կեսգիշերին նրանք դուրս են գալիս իրենց գերեզմաններից և պարում են՝ ասես ձգտելով երկարաձգել աղջկական պարերն ու խաղերը, որոնք այնքան կոպտորեն ընդհատել է վաղաժամ մահը: Եվ «վայ» նրան, ով աղջիկներին կհանդիպի այդ պահին: Լցված վրեժխնդրության զգացումներով, նրանք այդ մոլորյալին հրապուրում են իրենց պարի շրջապտույտների մեջ և պտտում անզգայացնելու աստիճան, մինչև, որ նա չտապալվի մահացած:

Ժիզել անունով երիտասարդ գյուղացի աղջիկը, իր սիրած Ալբերտի դավաճանությունից հետո ցնորվում է, զոհվում և վերածվում վիլլիսի: Սակայն նա փրկում է իր նման վիլլիսների շուրջպարի թակարդն ընկած Ալբերտին, քանի որ իր սերն անանց է, հավերժական…

Ադոլֆ Ադանի «Ժիզելը» առաջին անգամ բեմադրվել է 1841թ.-ին՝ Փարիզի «Գրանդ Օպերայում»:
    Դիտվել է 1098 անգամ