Քաղաքակրթական ներուժը կեցության բարձրագույն արժեք է:

Համալսարանի նախագահը ցանկանում է ամուսնանալ երիտասարդ գեղեցկուհու հետ

04.19.2016


Այսօր, ապրիլի 19-ին, Ռուսաստանի Մեծ թատրոնի նոր բեմում կներկայացվի «Գաետանո Դոնիցետիի «Դոն Պասկուալե» օպերայի առաջնախաղը: Այս ներկայացումը հանդիսատեսների շրջանում նախ և առաջ հետաքրքրություն է առաջացրել այն հանգամանքով, որ բեմադրել է երիտասարդ ռեժիսոր Տիմոֆեյ Կուլյաբինը, ով մինչ այդ Նովոսիբիրսկ քաղաքի օպերայի ու բալետի թատրոնում ցուցադրել էր Վագների «Թանհեյզեր» աղմկահարույց բեմադրությունը: Այդ մասին տեղեկացնում է «taglur.am»-ը՝ հղում անելով «РИА новости»-ին:

Հիշեցնենք, որ «Թանհեյզեր»-ի կապակցությամբ Նովոսիբիրսկի դատախազությունը վարչական վարույթ էր հարուցել Տիմոֆեյ Կուլյաբինի նկատմամբ՝ մեղադրելով նրան քրիստոնեական հավատը և արժեքները ոտնահարող առարկաներ ու տեսարաններ ներկայացման մեջ օգտագործելու համար: Սակայն, հետո այս գործը կարճվեց՝ հանցակազմի բացակայության պատճառով:

Ինչ-որ է, բայց ռեժիսորի ու արվեստագետի ստեղծագործական ազատության պաշտպանությամբ հանդես եկան բազմաթիվ մշակութային գործիչներ, որոնցից մեկն էլ Ռուսաստանի Մեծ թատրոնի գլխավոր տնօրեն Վլադիմիր Ուրինն էր: Նրա ասելով Կուլյաբինը «... տաղանդավոր մարդ է, որը հասկանում է թատրոնը, զգում՝ երաժշտությունը»: Եվ Մեծ թատրոնի գլխավոր տնօրենի հրավերով երիտասարդ ռեժիսորը հնարավորություն ստացավ իր բեմադրական տաղանդը ցուցադրել Ռուսաստանի մայրաքաղաքում:

Նշենք, որ աղմկահարույց և Նովոսիբիրսկի թատրոնի խաղացանկից հանված վագներյան օպերայից հետո «Դոն Պասկուալեն» Կուլյաբինի երկրորդ բեմադրական աշխատանքն է օպերային ժանրում:

Իր նոր ներկայացման մեջ Կուլյաբինը պահպանել է գործողության վայրը՝ այն ինչպես և հեղինակային մտահղացումն է պահանջում, տեղի է ունենում Հռոմում: Սակայն, դա ոչ թե պատմական, այլ ժամանակակից Հռոմն է: Իսկ հիմնական իրադարձություններն էլ ծավալվում են հավերժական քաղաքի մտածացին համալսարանում, որի կերպարը ամբողջացվել է հին Իտալիայի մի քանի համալսարանների համատեղման արդյունքում:

«Դա մշակույթի մի յուրահատուկ հանգրվան է, հոգևոր հատիկ, իսկ մեր Դոն Պասկուալեն այդ համալսարանի նախագահը, հայտնի և հարգված մարդ, բազմաթիվ մրցանակների դափնեկիր»,- նշել է Կուլյաբինը:

Կուլյաբինի Դոն Պասկուալեն, ինչպես և Դոնիցետիի մոտ, տարեց տղամարդ է, ով ցանկանում է ամուսնանալ երիտասարդ գեղեցկուհու հետ:

«Այս օպերան Դոնիցետին գրել է մահվանից ոչ շատ առաջ, ոչ այնքան պարզ, ես կասեի իր կյանքի ողբերգական հանգամանքների ժամանակաշրջանում: Նրա հերոսների և հակամարտությունների մեջ գուշակելի է երկիծանք, եթե ոչ զավեշտ իր իսկ նկատմամբ: Մենք ձգտել ենք գտնել այնպիսի իրողություններ, որոնք կպահպանեին ինտրիգի բնօրինակությունը և համընդհանուր ուրախությունը, բայց, միաժամանակ, առավել լսելի դարձնելով Դոնիցետտիի հեղինակային ծաղրը»,- ասել է ռեժիսորը:

Ավելացնենք, որ այս երեկո Մեծ թատրոնի օպերայի նվագախումբը կղեկավարի Լեհաստանից հրավիրված դիրիժոր Միխայիլ Կլաուզեն, իսկ Դոն Պասկուալեի դերում հանդես կգա իտալացի հայտնի բաս Ջովանի Ֆուռլանետոն:

«Դոն Պասկուալե» օպերան առաջին անգամ բեմադրվել է 1843 թ.-ին Փարիզի իտալական երաժշտական թատրոնում և մինչև այսօր համարվում է կոմիկական ժանրում եզակի ստեղծագործություններից մեկը Համաշխարհային թատրոնի պատմության մեջ:
    Դիտվել է 906 անգամ