Քաղաքակրթական ներուժը կեցության բարձրագույն արժեք է:

Մեկնարկեց Թատերական ռեժիսուրայի X հանրապետական փառատոնը

11.22.2016

Այսօր՝ նոյեմբերի 22-ին, Երևանի Հ. Թումանյանի անվան տիկնիկային թատրոնում: մեկնակեց Երիտասարդ թատերական ռեժիսուրայի X հանրապետական փառատոնը, որին այս տարի մասնակցում են բեմադրիչներ՝ Երևանից և Գյումրիից:

Երիտասարդ թատերական ռեժիսուրայի հանրապետական փառատոնը հիմնադրել է Հայաստանի թատերական գործիչների միությունը՝ ՀՀ ժողովրդական արտիստ, պրոֆեսոր Երվանդ Ղազանչյանի նախաձեռնությամբ՝ 2006թ.-ին:

Փառատոնի գլխավոր նպատակն է ներկայացնել երիտասարդ ռեժիսորների գործեր, բացահայտել նոր անուններ, ինչպես նաև պատկերացում կազմել արդի թատրոնի երիտասարդ ռեժիսորների ստեղծագործական նախասիրությունների մասին:

Երիտասարդ թատերական ռեժիսուրայի հանրապետական փառատոնին ներկայացվում են այն աշխատանքները, որոնք բեմադրվել են նախորդ թատերաշրջանում: Յուրաքանչյուր ներկայացումից հետո, ըստ փառատոնի ձևաչափի կանցկացվեն քննարկումներ:

Թատերական ռեժիսուրայի X հանրապետական փառատոնի աշխատանքներին մասնակցում են նաև Մոսկվայից ժամանած փորձագետներ` Մոսկվայի Մեյերհոլդի կենտրոնի ղեկավար Վիկտոր Ռիժակովի գլխավորությամբ:

Ռուսաստանցի հյուրերը այս ստուգատեսի ընթացքում կընտրեն ներկայացում Մոսկվայի թատերական միությունների միջազգային կոնֆեդերացիայի՝ ԱՊՀ, Մերձբալթյան երկրների և Վրաստանի երիտասարդական թատերական ֆորումին մասնակցելու համար, որը կկայանա 2017թ. ամռանը` Ալմաթի քաղաքում (Ղազախստան):

Ավելացնենք, որ փառատոնը, որի աշխատանքները կեզրափակվեն նոյեմբերի 25-ին, անցկացվում է ՀՀ մշակույթի նախարարության աջակցությամբ:
    Դիտվել է 855 անգամ