Թատրոնները կդադարեն պիեսներ բեմադրել երեխաների համար
07.20.2017
Ռուսաստանում պետական ֆինանսավորմամբ մեկնարկել է «Թատրոնը երեխաներին» նախագիծը, որի համար երկրի բյուջեից տարեկան կհատկացվի 300 մլն ռուբլի: Այս նույն ծրագրի համար ֆինանսավորում է նախատեսվում նաև տարածքային և մունիցիպալ բյուջեներից: Թատրոնների ներկայացուցիչները այս ծրագրով նախատեսված միջոցների բաշխման հարցով պահանջում են հասարակական կոշտ վերահսկողության իրականացում: Այդ մասին տեղեկացնում է «taglur.am»-ը՝ հղում անելով «iz.ru»-ին:
Նախագծի գաղափարը հղացել է դերասան Սերգեյ Բեզռուկովը: Նրա կարծիքով, եթե այսօր պետությունը չօգնի, ապա վաղը թատրոնները կդադարեն պիեսներ բեմադրել երեխաների համար, քանի որ տնտեսական առումով դա նպատակահարմար չէ:
Սանկտ-Պետերբուրգի տիկնիկային մեծ թատրոնի տնօրեն Ալեքսանդր Կալինինը նշել է, որ ֆինանսները բաշխելիս շատ կարևոր է ուշադրությունը տարածաշրջանների թատրոնների վրա ուղղելու խնդիրը, որոնց մի մասի համար դաշնային պետական միջոցներն անհասանելի են: Նա նաև նշել է, որ իրենց տիկնիկային թատրոնը, ինչպես և երկրի մանկական թատրոններից շատերը, մանուկների համար նախատեսված թատերական նախագծերին աջակցելունպատակով հաճախ են բեմադրում ներկայացումներ մեծահասակների համար: Նրա ասելով Սանկտ-Պետերբուրգի տիկնիկային մեծ թատրոնում տարեկան ցուցադրվում է 400 ներկայացում, որոնցից 100-ը հասցեագրված են մեծահասակներին:
Թեև թատրոնների ներկայացուցիչները նշել են, որ հատկացված 300 մլն-ը Ռուսաստանի բոլոր թատրոններին բաշխելու պարագայում կաթիլ է ծովում, սակայն այն փաստը, որ այսպիսի գործընթաց է սկսվում, ուրախալի է:
Ավելացնենք, որ պետության կողմից մանկական թատրոններին հատկացված 300 մլն-ից 220 մլն-ռուբլին կհատկացվի տարածքային և մունիցիպալ թատրոններին:
 28.11.jpg)
.jpg)
