2017թ.-ին թատրոնի ոլորտում լավագույնները՝ ըստ հանդիսատեսների
12.05.2017

«Զվեզդա տեատրալա» մրցանակաբաշխությունը իր տեսակի մեջ յուրահատուկ թատերագիտական գնահատական է, որովհետև հաղթողները որոշվում են հանդիսատեսների քվեարկությամբ: Այս տարի այդ արարողությանը, որը մեկնարկել էր հունիսի 10-ին և եզրափակվել նոյեմբերի 30-ին, մասնակցել է 90 հազար մարդ:
«Արտասահմանյան լավագույն ռուսական թատրոն» անվանակարգում առաջնությունը տրվել է Ուկրաինայի մայրաքաղաք Կիևում գործող Լեսա Ուկրաինկայի անվան դրամայի ազգային թատրոնին:
«Լավագույն երաժշտական ներկայացում» է ճանաչվել «Մոսկվայի օպերետ» թատրոնում բեմադրված «Աննա Կարենինան»: Բացի այդ այս թատրոնը ճանաչվել է թատերաշրջանի ընթացքում տոմսերի վաճառքով առաջատարը և ստացել է տոմսեր իրացնող ռուսաստանի խոշորագույն «Ticketland.ru» ընկերության հատուկ մրցանակը:
«Երեխաների և պատանիների համար լավագույն ներկայացում» անվանակարգում Թատերասերների կողմից հաղթողի աստղ է ստացել Սացի անվան մանկական երաժշտական թատրոնի «Անճոռնի ճուտիկը» օպերան, որի բեմադրող ռեժիսորն է Գեորգի Իսահակյանը:
Ի դեպ, մրցութային հանձնաժողովի աչքից չի վրիպել նաև «Զվեզդա տեատրալա» մրցույթի շրջանակներում ակտիվ գործունեություն ծավալած թատրոնը, որը քարոզում է մրցանակաբաշխության անցկացման կարևորությունը՝ դրանով իսկ քաղաքացիների շրջանում տարածելով թատրոնի նկատմամբ առավել մեծ հետաքրքրություն: Այդ առումով հատկապես առանձնացվել է Սանկտ-Պետերբուրգի «Նա նևե» («Նևայի վրա») թատրոնի կատարած աշխատանքը: Այդ թատրոնի ղեկավարությանն է հանձնվել հատուկ դիպլոմ:
Թատերասերների քվեարկությամբ մրցանակներ են բաժանվել նաև երկրորդ պլանում լավագույնը ճանաչված կնոջ և տղամարդու կերպարներ մարմնավորած, ինչպես նաև կինոյում լավագույնս հանդես եկած թատերական արտիստները: Մրցանակով է առանձնացվել նաև արդեն իրականացված լավագույն սոցիալական «Մաուգլու սերունդ նախագիծը:
Ռուսաստանցի հանդիսատեսները 2017թ.- իրենց «սիրելի թատրոն» են համարել «Մոսսովետի» անվան թատրոնը: Իսկ տղամարդ դերասաններից լավագույն են ճանաչել Ալեքսանդր Կալյագինին, որն իր ղեկավարությամբ գործող «Et Cetera» թատրոնում մարմնավորել է գոգոլյան հայտնի կերպարին՝ Խլեստակովին՝ այստեղ բեմադրված «Ռևիզոր:Վարկած» բեմադրության մեջ:
Այս տարի ռուսաստանյան թատերական համայնքի լավագույն ռեժիսորը ըստ «Զվեզդա տեատրալա» մրցույթի Վախթանգովի անվան թատրոնի գեղարվեստական ղեկավար Ռիմաս Տումինասն է, իսկ նոր բեմադրած «Արքա Էդիպը» համարվել է «Մեծ ձևի մեջ լավագույն ներկայացումը»: «Փոքր ձևի մեջ լավագույն ներկայացումը» նույնպես ռուսաստանում գործող մերձբալթյան ծագմամբ ռեժիսորի է բաժին հասել: Դա Մինդաուգաս Կարաբաուսկասն է, որը Մայակովսկու անվան թատրոնում բեմադրել է Մարիուս Իվաշկյավիչուսի «Վտարում» պիեսը:
«Զվեզդա տեատրալա» մրցույթում կա նաև «Բեմի լեգենդ» անվանակարգը: 2017թ.-ին այդ պատվավոր կոչմանը արժանացել են Իրինա Միրոշնիչենկոն (Մոսկվայի Չեխովի անվան գեղարվեստական թատրոն) և Ալեքսանդր Շիրվինդտը (Մոսկվայի երգիծանքի թատրոնի գեղարվեստական ղեկավար):