Միջազգային փառատոն «ռազմավարական նշանակության» ոլորտում
06.05.2018

Փառատոնը կընթանա երկու օր: Այսօր երեկոյան տեղի կունենա գալա-համերգ, որին կմասնակցեն 2018թ.-ի մրցանակի թեկնածուները: Ապա կկայանա պարգևների հանձնումը հաղթողներին:
Այս տարվա մրցանակաբաշխության արարողությանը մասնակցում են բալետի աշխարհի այնպիսի հայտնի դեմքեր, ինչպիսիք են Սիլվի Գիլեմը, Նատալիա Մակարովան, Թամարա Ռոխոն և ուրիշներ:
Փառատոնի հաջորդ օրը, հունիսի 6-ին կայանալիք մասն ունի «Նվիրվում է Պետիպային: Դասականը՝ ժամանակակից խորեոգրաֆների աչքերով» ենթավերնագիրը:
Այդ երեկո նույնպես կկայանա գալա-համերգ, որին, սակայն, կմասնակցեն «Benois de la Danse»-ի տարբեր տարիների մրցանակակիրները: Հիմնականում կներկայացվեն Ռուսական բալետի ֆրանսիացի մեծագույն խորեոգրաֆի բեմադրած դասական գործերից դրվագներ, և այնպիսիք, որոնք կատարվում են նաև այսօր:
«Benois de la Danse» փառատոնը բալետի ոլորտում ունի նույն համբավը, ինչ կինեմատոգրաֆիայում ամերիկյան «Օսկարը»: Այն շնորհվում է անցած մեկ տարվա ընթացքում խորեոգրաֆիայի ոլորտում կատարած նվաճումների համար:
Մրցանակաբաշխությունը հիմնադրվել է 1991թ.-ին՝ Մոսկվայում, Խորեոգրաֆիայի գործիչների միջազգային միության կողմից:
Ավելացնենք, որ փառատոնի բացումից առաջ, այս տարի ժյուրի անդամ դարձած Սանկտ-Պետերբուրգի բալետի թատրոնի հայտնի գեղարվեստական ղեկավար Բորիս Էյֆմանը, խոսելով իր ներկայացրած ոլորտի մասին, նշել է, որ «Բալետը ռազմավարական առումով կարևոր արվեստ է»:
Նա նաև ասել է, որ «Benois de la Danse» փառատոնը «... առաջին մակարդակի բալետային տոն է, որը հավաքում է լավագույն խորեոգրաֆներին, արտիստներին՝ ամբողջ աշխարհից»: