Քաղաքակրթական ներուժը կեցության բարձրագույն արժեք է:

Հայ ռեժիսորը բեմադրություն է պատրաստում աշխարհի հնագույն ամֆիթատրոններից մեկում

06.07.2018

Համացանցի իր ֆեյսբուքյան էջում ռեժիսոր, Հայաստանի թատերական գործիչների միության նախագահ Հակոբ Ղազանչյանը տեղադրել է Մակեդոնիայում «Անտիկ ժամանակներից մեզ հասած «Ստոբի» ամֆիթատրոնի» լուսանկարը և համառոտ գրությամբ տեղեկացրել, որ «Այսօր (հունիսի 7-ին-խմբ.) այստեղ սկսեցի «Լիսիստրատա» բեմադրության փորձերը...

Խոսքը մ.թ.ա. 5-րդ դարի հույն դրամատուրգ Արիստոֆանի հայտնի կատակերգության մասին է, որտեղ ներկայացվում է պատերազմ մեկնած տղամարդկանց հաշտության դաշտ բերելու և խաղաղ կյանքի ու սիրո տարածություն վերադարձնելու համար կանանց կատարած ոչ սովորական արաքը:

Ողջ Հունաստանի կանայք աթենուհի Լիսիստրատայի գլխավորությամբ միավորվում և առանձնանում են Ակրոպոլիսում: Փակվելով այնտեղ՝ նրանք հրաժարվում են տղամարդկանց հետ սիրով զբաղվել՝ մինչև այն ժամանակ, քանի դեռ նրանք շարունակում են իրենց կռիվը և չեն հրաժարվում պատերազմելու մտքից....

Ինչպես տեղեկացրեց Հակոբ Ղազանչյանը, բեմադրությունը իրականացվում է Մակեդոնիայի Վելես և Սկոպյե քաղաքի դրամատիկական թատրոնների արտիստների մասնակցությամբ:

Գլխավոր հերոսուհու՝ Լիսիստրատայի կերպարը մարմնավորում է դերասանուհի Իռենա Իլիևսկան:

Ներկայացման պրեմիերան կայանալու է հուլիսի 19-ին:
    Դիտվել է 972 անգամ