Քաղաքակրթական ներուժը կեցության բարձրագույն արժեք է:

Մահից առաջ նկարում է իր երազը...

05.14.2019

Այսօր՝ մայիսի 14-ին, Մոսկվայում մեկնարկել է Չեխովի անվան 14-րդ թատերական փառատոնը: Միջոցառմանը մասնակցում են 16 երկրներից ժամանած թատերախմբեր, որոնք կցուցադրեն 22 ներկայացում: Այդ մասին տեղեկացնում է «taglur.am»-ը՝ հղում անելով «tvkultura.ru»-ին:

Այս տարի փառատոնը սկսվել է թատրոնի պատերից դուրս՝ փողոցում, ներկայացումներից լուսանկարչական ապարատով որսած պատկերաշարերի ցուցադրմամբ:

14-րդ չեխովյան փառատոնը կարելի է ասել ունի արևելյան շեշտադրում: Դրա մասին է խոսում նաև լուսանկարների բացօթյա ցուցահանդեսը, որը նվիրված է չինական թատրոնին: Ասենք որ չին արտիստները լրիվ պատրաստ են այդ մեծ պատասխանատվությանը և նրանց թատերախումբը նախատեսել է Մոսկվայում ցուցադրել 5 բազմաժանր ներկայացում:

Բնականաբար փառատոնն էլ կբացեն չին արտիստները: Նրանք մոսկվացիներին առաջինը կներկայացնեն «Վարդակակաչե տաղավար» օպերան: Այն կցուցադրվի լճակի ջրերի վրա բարձրացած հարթակին: Հանդիսատեսները այդ բեմին ծավալվող գործողություններին կհետևեն լճակի երկու ափերից:

«Բավականին բարդ էր այսպիսի հարթակին հարմարվելը, քանի որ չինական լճակներն անպայման ունեն կորացող եզրագիծ, իսկ այստեղ ամեն գիծ ուղիղ է»,- նկատել է ռեժիսոր Լի Յաո Պինը: Բացի այդ հանդիսատեսները հայրենիքում նրանց ներկայացումը դիտում են լճակի միայն մեկ ափից:

Սակայն ամեն ինչ կարգավորվել է հարթակը բեմական միջավայր դարձնելով և այն բանի շնորհիվ, որ ռեժիսորը դերասանների առջև խնդիր է դրել ստեղծված իրավիճակում լիճը դարձնել իրենց դաշնակիցը:

Շանհայի օպերայի «Կունցոյ» կենտրոնի արտիստները սովոր են դժվարությունների մեջ դիտարկել նոր հնարավորություններ: Ցուցադրվելիք ներկայացման վերաբերյալ նրանց միակ մտահոգությունը կապված է Ռուսաստանի մայրաքաղաքի եղանակի հետ: Նրանք անհանգստանում են, որ Մոսկվայում հանկարծ այս երեկո անձրև չտեղա...

«Վարդակակաչե տաղավարը» հնագույն «Կունցոյ» օպերայի դասական գործ է: Այն համարվում է «չինական օպերայի մայրը»:

Գեղեցկուհի Դու Լինյանը սիրելիին հանդիպում է երազում՝ գեղեցիկ, թռչունների դայլայլով ու ծաղիկներով լի այգում: Արթնանալով և իր մոտ չտեսնելով պատանուն, Լինյանը ընկնում է խոր տրտմության մեջ և մահանում է: Սակայն մահից առաջ նա նկարում է իր երազը և հրամայում իր նաժիշտին, որ այն տեղադրեն այգում:.. Սա օպերայի առաջին հատվածն է, իսկ հետո հնագույն օպերան հանդիսատեսին հաստատապես ուղեկցում է գեղեցիկ սիրո և հուզմունքի աներևակայելի մի նրբին աշխարհ...


    Մշակույթը նվիրյալի գործ է, իսկ մշակույթի նվաճումներին հանրությանը ծանոթացնելը քաղաքացիական պարտք: Թղթակցեք «Թագլուր» կայքին;

    Հեռ.: 099.31.74.60
    էլ. Փոստ: taglur@yahoo.com

    Դիտվել է 929 անգամ