Քաղաքակրթական ներուժը կեցության բարձրագույն արժեք է:

Թատրոն, որը փոփոխությունների հույս է արթնացնում

12.07.2022

Ընթացիկ շաբաթվա վերջին երեք օրերը Մոսկվայի «Տեատր․doc» անկախ թատրոնը կնվիրի իր լավագույն հեղինակներից մեկին՝ Արթուր Սոլոմոնովին։ Այս յուրահատուկ փառատոնը կմեկնարկի «Տեատր․doc֊ը կղզում» անունը կրող տարածքում՝ դրամատուրգի «Երանություն» նոր պիեսի պրեմիերայով։ Այդ մասին տեղեկացնում է «taglur.am»֊ը՝ հղում անելով «teatral-online.ru»֊ին։

«Սա ինձ համար մեծ ուրախություն ու պատիվ է։ Չ՞է որ «Տեատր․doc»֊ը կարծես թե Ռուսաստանի թատերական քարտեզում միակն է, որտեղ քաղաքացիական խիզախությունը համընկնում է գեղարվեստական որակի, յուրահատուկ ստեղծագործական մեթոդի հետ»,֊ նշել է Արթուր Սոլոմոնովը և իր ուրախությունն ու երախտագիտությունը հայտնել թատերախմբին, որը կարողացել է պահպանել այս մշակութային օջախը՝ հիմնադիրների մահից հետո։

Սոլոմոնովը նաև կարծիք է հայտնել, որ բոլոր համակիրներն իրենց ողջ ուժով պետք է սատար կանգնեն «Տեատր․doc»֊ին, քանի որ «նրա գոյությունն իսկ հնարավորություն է տալիս հուսալ, որ երկրում փոփոխություններ կկատարվեն»։

Խոսելով «Երանություն» բեմադրություն մասին, դրամատուրգը նշել է, «Պատկերացրեք ապագայի Ռուսաստանը։ Կարելի է նաև ոչ Ռուսաստանը, բայց չէ՞ որ ավելի հարմար է պատկերացնել այն երկիրը, որտեղ մենք ապրում ենք։ Աբսուրդը լիքն է ամեն տեղ․․․»։

Ըստ Սոլոմոնովի բոլորն են մտածում, որ լինելու է «գեղեցիկ ապագայի Ռուսաստանը»։ Սակայն, նա առաջարկում է պատկերացնել այն Ռուսաստանը, որտեղ «մարդկանց արարքները ու մտքերը հսկում են հատուկ կառույցները»։

Փառատոնային ներկայացումներից մյուսը կրում է «Թե ինչպես մենք հուղարկավորեցինք Իոսիֆ Վիսարիոնովիչին» վերնագիրը։ Այս տրագիֆարսը հնարավորություն է տալիս հետևել, թե ինչպիսի ճանապարհներով է ժամանակակից մարդու հոգի սողոսկում ստալինիզմը։

Երրորդ օրը նվիրված կլինի թատերական ընթերցանությանը։ Կընթերցվեն Արթուր Սոլոմոնովի «Թատերական պատմություններ» գրքից հատվածներ, որոնց հերոսների մեջ կհանդիպեն նաև օլիգարխներ, հոգևորականներ, թատերական գործիչներ, տնային կատուներ և այլն։

Յուրաքանչյուր ներկայացումից հետո հանդիսատեսների հետ հեղինակը տեսակապի միջոցով կքննարկի օրվա ներկայացումը։ Այդ քննարկումներին, տարբեր քաղաքներից և երկրներից, կրկին տեսակապով, կմիանան նաև տարբեր թատերական գործիչներ։





Լուսանկարն՝ ըստ հղման աղբյուրի


    Մշակույթը նվիրյալի գործ է, իսկ մշակույթի նվաճումներին հանրությանը ծանոթացնելը քաղաքացիական պարտք: Թղթակցեք «Թագլուր» կայքին;

    Հեռ.: 099.31.74.60
    էլ. Փոստ: taglur@yahoo.com

    Դիտվել է 442 անգամ