Երկուսը արդեն Հիտլեր խաղացել են, իսկ երրորդը մարմնավորել է Գեբելսին
03.20.2024
Այսօր, մարտի 20֊ին, Մոսկվայի «Ստանիսլավսկի» էլեկտրաթատրոնի Փոքր բեմում կհայտնվի...Հիտլերը։ Ռեժիսոր Ելենա Ստարոդվորցևան հանդիսատեսին կներկայցնի գերմանացի դրամատուրգ Թերեզիա Վալզերի «Անդորր փոթորիկից առաջ» պիեսի իր ընթերցումը։ Այդ մասին տեղեկացնում է «Թագլուրը»՝ հղում անելով « oteatre.info»֊ին։
Թերեզիա Վալզերը ժամանակակից դրամատուրգ է, կրթությամբ դերասանուհի։ Նա Երկրորդ համաշխարհային պատերազմի մասնակից, գերմանացի հայտնի գրող Մարթին Վալզերի դուստրն է և հայտնի է դարձել իր «հակաիրատեսական» պիեսներով, որոնցում «հրեշավորը ի հայտ է գալիս ամենասովորականում, իսկ երգիծականը՝ խոր թախծի մեջ»։
«Անդորր փոթորիկից առաջ» պիեսը նա գրել է 2006թ․֊ին։ Այն ժանրով «ինտելեկտուալ կատակերգություն է»։ Պիեսը կառուցված է որպես երեք դերասանների երկխոսություն։ Նրանք սպասում են « Արդյո՞ք կարելի է և, եթե՝ այո, ապա՝ ինչպե՞ս պետք է խաղալ Հիտլերին» թեմայով քննարկմանը»։
Քանի դեռ քննարկումը վարողը չի եկել, դերասանները դատարկ բեմում զրուցում են իրար հետ։ Նրանցից երկուսը արդեն Հիտլեր խաղացել են, իսկ երրորդը մարմնավորել է Գեբելսին, սակայն այդ ամենը եղել է կինոյում։ Իսկ քննարկմանը, որին նրանք սպասում են, խոսքը պետք է լինի թատրոնի մասին։
Պիեսի նկարագրություններից մեկում նշված է, որ Թոմաս Բերնհարդի «Շրջիկ դերասանը» հանդիպում է Բերնդ Այխինգերի «Բունկերին»։
«Անդորր փոթորիկից առաջ»֊ը դերասանի մասնագիտական բնույթի հետազոտություն է, ժամանակակից թատրոնի ձևի և իմաստի հետ առնչվող գեղագիտական և բարոյագիտական թեմաներով վեճ, նաև՝ մտորումներ այն մասին, թե ինչպե՞ս է անհատականությունը տարալուծվում սոցիալական դիմակների և մշակութային կարծրատիպերի մեջ։
Լուսանկարն՝ ըստ հղման աղբյուրի
 28.11.jpg)
.jpg)
