Բեմադրությունների համար ստեղծագործական խմբի անդամները չեն վարձատրվում
09.11.2024
Ուելսի Փենարթ քաղաքում հասարակական կարգով գործում է մոտ 80 հոգուց ձևավորված մի թատերախումբ, որը եկող տարի կնշի իր 100-ամյակը: Այս սիրողական թատերախումբը արդեն մեկ դար շարունակ իր հանդիսատեսներին է ներկայացնում բեմարվեստի երկու ձևաչափով հիանալի բեմադրություններ և դեռ վճռական և վստահ ակնկալիքներ ունի ապագայի հանդեպ։ Այդ մասին տեղեկացնում է «Թագլուրը»՝ հղում անելով «bbc.com»֊ին։
Փենարդի օպերայի և դրմատիկական համայնքը (PODS֊ը) Ուելսում ամենահներից մեկն է; Այն այսօր անհավասար մրցակցության մեջ է հայտնվել համացանցային Netflix-ի և YouTube-ի հոսքային հսկաների հետ և այժմ փորձում է գտնել իր գործունեության տիրույթում հանդիսատեսին ներգրավելու նոր ուղիներ։
1925 թվականին «Իոլանթե» կատակերգական օպերայի իրենց առաջին կատարումից մինչև 2024 թվականին ցուցադրված Դիլան Թոմասի «Under Milk Wood»-ը, գործերն առաջ են մղվել դրական արդյունքներով:
Կազմակերպության և հանրության կապերի պատասխանատու Փիթեր Նոուլզը նշել է, որ «հպարտ» է իրենց ժառանգությամբ։ Նա ընդգծել է, որ շարունակում են աշխատել, որպեսզի մարդիկ գան տեսնելու իրենց բեմադրությունները: «Հուսով եմ,֊ ասել է նա,֊ որ մարդիկ, ովքեր նախաձեռնել են PODS-ը, կնայեն այն ստեղծագործական կազմին, որը մենք ունենք այսօր և հպարտ կզգան, թե ինչպես ենք առաջ տանում նրանց ժառանգությունը»։
Նոուլզը հայտարարել է, որ իրենց խմբին հետաքրքիր կլինի տեսնել, թե ինչպես է զարգանում կենդանի թատրոնը ժամանակի ընթացքում: Նա հիշեցրել է, որ PODS-ը առաջին անգամ, երբ սկսեց, մեծ մյուզիքլներ չկային, այլ կային պարզապես թեթև օպերետներ, իսկ այսօր մրցասպարեզում Netflix-ը, Youtube-ն ու մյուս հոսքային ալիքներն են։
«Մարդկանց ժամանցի աղբյուրներն այժմ շատ բազմազան ու մեծ են, և կենդանի թատրոնը պետք է մրցի դրանց հետ, դա մարտահրավեր է»,֊ ասել է Փիթեր Նոուլզը:
80 մշտական կատարողներից բացի, PODS-ի հասարակական մշակութային գործունեությանը անդամագրված են նաև 45 կրտսեր գործընկերներ, որոնք կազմում են համայնքի երիտասարդական թևը։ Վերջիներս տարեկան չորս շոուներ են բեմադրում և ներկայացնում հանրությանը։ Այդ բեմախաղերից երկուսը սովորաբար մյուզիքլ են և երկուսը Սուրբ ծննդյանը նվիրված մնջախաղ։
100-ամյա հոբելյանը նշելու համար խումբը նախատեսել է սեպտեմբերին կազմակերպել հատուկ շոուների շարք:
Նոուլզը նշել է, որ իրենք փնտրում են բեմադրությունները նորովի և գրավիչ ներկայացնելու թարմ եղանակներ։ Նա նաև ընդգծել է,֊ «Երբեմն թատրոնը գրավում է միայն որոշակի տարիքային խմբերի մարդկանց, սակայն մենք պետք է աշխատենք ներգրավել մեր համայնքի բոլոր տարիքային խմբերին»։ Նա նշել է, որ այդ մտադրության շրջանակներում իրենք փորձում են հնարավորինս ցածր պահել տոմսերի արժեքը, ֊ «․․․որպեսզի նրանք, ովքեր չեն կարող իրենց թույլ տալ գնալու ավելի մեծ թատրոններ, կարողանան այցելոլ իրենց»։
Ավելացնենք, որ տոմսերի վաճառքից գոյացած հասույթը հիմնականում օգտագործվում է հաջորդ ներկայացումները պատրաստելիս անհրաժեշտ ծախսերը հոգալու նպատակով, իսկ բեմադրությունների վրա կատարվող աշխատանքի և ցուցադրության համար խմբի անդամները չեն վարձատրվում։
Լուսանկարն՝ ըստ հղման աղբյուրի։
 28.11.jpg)
.jpg)
