Քաղաքակրթական ներուժը կեցության բարձրագույն արժեք է:

Կսալարկվի «ԳՈՒԼԱԳ-ից բերված քարերով

08.07.2017

Նախօրեին, օգոստոսի 6-ին, Մոսկվայում Ակադեմիկոս Սախարովի պողոտայի և Սադավոյե կոլցո մայրուղու խաչմերուկի մոտ է տեղափոխվել ստալինյան քաղաքական ռեպրեսիաների զոհերի հիշատակը հավերժացնող «Ողբի պատ» հուշարձանի առաջին մասը: Այդ մասին տեղեկացնում է «taglur.am»-ը՝ հղում անելով «ՏԱՍՍ»-ին:

6 մետր բարձությամբ 30,3 մետր լայնքով բրոնզաձույլ հուշարձանի հիմնական մասը, ինչպես ներկայացրել է հեղինակը՝ Գեորգի Ֆրանգուլյանը, բաժանված է 9 կտորի, որոնք «հետևողականորեն օրեցօր կտեղափոխվեն» ձուլարանից և կտեղադրվեն գրեթե արդեն պատրաստ հիմքի վրա և կհավաքվեն:

Քանդակագործի ասելով «ըստ իրենց պլանների մինչև ամսվա վերջը» հուշարձանի բոլոր կտորները կբերվեն և կհավաքվեն:

«Ողբի պատը» երկկողմանի խորաքանդակ է, որի մեջ կան նաև մի քանի կամարներ: Այն ներկայացնում է բազմաթիվ անորոշ դեմքերով մարդկային ֆիգուրների ամբողջություն: Խորաքանդակի երկու կողմերում բրոնզաձույլ հարթակներ են, որոնց վրա 23 լեզվով գրաված է «Հիշիր» բառը: Հուշարձանի հրապարակը ենթադրվում է, որ կսալարկվի ստալինյան տխրահռչակ բանտերի՝ «ԳՈՒԼԱԳ-ի գտնվելու վայրերից բերված քարերով:

Ռուսաստանի նախագահին կից գործող քաղաքացիական հասարակության զարգացման խորհրդի նախագահ Միխայիլ Ֆեդոտովի ասելով հուշարձանի գրանիտով կերտված հատվածում կփորագրվեն ևս 4 բառեր՝ «Հիշել», «Իմանալ», «Դատապարտել», «Ներել»:

Ֆեդոտովը նշել է, որ այս հուշարձանով իրենք պետք է ամփոփիչ գիծ քաշեն 20-րդ դարի ողբերգության տակ:
Ծանոթություն:

Ռուսաստանի նախագահ Վլադիմիր Պուտինը այս բովանդակությամբ հուշարձանը կառուցելու հրամանագիրը ստորագրել է 2015թ.-ի աշնանը: Հայտարարվել է մրցույթ, որին մասնակցել է 338 նախագիծ: Մրցութային հանձնաժողովը նախապատվությունը տվել է հայ քանդակագործ Գեորգի Ֆրանգուլյանի առաջարկածին:

Հուշարձանի ֆինանսավորումը ստանձնել է Մոսկվայի քաղաքային իշխանությունը՝ դրա համար հատկացնելով 300 մլն ռուբլի: Դրա հետագա զարգացման աշխատանքներն իրականացնելու համար պահանջվող միջոցները ձեռք կբերվեն նվիրատվություններով, Հիշատակի հիմնադրամի կողմից կազմակերպվող դրամահավաքներով: Այս ուղղությամբ հիմնադրամն արդեն կարողացել է հայթայթել 40 մլն ռուբլի:

Նախատեսված է, որ հուշարձանի բացումը կկայանա 2017թ.-ի հոկտեմբերի 30-ին՝ քաղաքական ռեպրեսիաների զոհերի հիշատակի օրը:




Այս թեմայով այլ հղումներ-1
    Դիտվել է 366 անգամ